((الجزء الثاني))
حسيت بلحظتها ان فيه احد ضربني كف على وجهي،حسيت ان الدنيا صارت سوداء بوجهي ،حسيت ان كل اللي حولي صار وهم وخيال وانا الحقيقة اللي بينهم،
اخذت دموعي تنزل من عيوني وانا فاغر فمي وما حركت ساكن ،جت امي وضمتني وحطت يدها على راسي وانا ولا جزء من جسمي تحرك الا دموعي اللي طلعت من غير
استئذان ،تركت امي ورحت بعيد ووقفت في مواقف المستشفى وجلست على الرصيف،كل اللي اذكره اني كنت قاعد وحاط يديني على راسي ودموعي من كثرها صارت
تنزل للأرض(بدون مبالغة)،فجأة قمت متوجه لغرفة الطوارئ وادخل على اهلي ،واروح لسرير شذى وأوقف فوق راسها ،حسيت ان حبي في هالدنيا مات وماراح يبقى
لي حب،حسيت ان الحب بالنسبة لي كله متجمع على شكل انسان ومات هالإنسان وهو الحين متمدد قدامي ،حسيت وحسيت وحسيت،وبدون شعور مسكت شذى وقعدت
أهزها :شذى تسمعيني انتي مافيكي شي ؟صح انتي مافيكي شي،يالله قومي وكلميني ؟شذى قومي وقولي لي:أحبك ،يالله افتحي عيونك،شذى ردي علي ،
والتفت على يميني والقى الدكتور واقف وذابحته العبرة ،قلت له:دكتور شذى مافيها شي ؟صح ،لا انت تكذب علي يادكتور شذى ماماتت ،وكل اللي في الغرفة
انفجروا صياح ،وأطلع زي المجنون (بل مجنون)من المستشفى وأمشي في شوارع المجمعة:ياناس ياعالم شذى ماماتت لا ماماتت !!ويلقاني واحد الله يذكره
بالخير إسمه.....المنصور)كان رايح للدوام ،وقف السيارة وجاء لمي وانا أصارخ:يالحبيب شذى ماماتت صح والا لا؟؟(هو كان فاهم وعاقل وعلى طول
فهم وضعي)قال:ايه ماماتت ،وبعدها اغمي علي من التعب وكان جوالي يدق اخذه الرجال ورد على حمودي،حمودي :من انت؟؟؟
الرجال:وعليكم السلام،وقاله ان خالد لقيته بالشارع واغمي عليه وهو الحين عندي بالبيت نايم واذا صحى راح اعطيك خبر.
صحيت والاقي نفسي بغرفة نوم والساعة تقريبا 4 العصر والقى الرجال قاعد بجنبي ،قلت:ويني فيه؟وش اللي جابني هنا؟؟
قال:انت ضيف عند اخوك (.....المنصور).
قلت:والنعم فيك ،لكن وش اللي جابني هنا؟
ويبدأ يقول لي السالفة كلها وان حمودي اتصل فيه واذا صحيت بيعطيه خبر،ربع ساعة وحمودي عند الباب ،ركبت معاه بعد ماتشكرت من الرجال وعلى طول
مسكنا خط القصيم،سألت حمودي :وش اللي صار؟
قال :أهلك وخالتك راحوا ل(...) وشهد حولوها لمستشفى (...)،وشذى الله يرحمها بيحولون جثتها ل(...) بيدفنونها هناك .
أسبوع كامل من قومتي الى نومتي وانا دوران على السيارة ومشغل أغنية حسين الجسمي(والله مايسوى)ومنقطع عن الناس وجوالي 24ساعة مقفل،طلعت شهد من
المستشفى وهي بأتم الصحة والعافية ولله الحمد،رجعوا خالتي للرياض وانا صار لي فترة مارحت للجامعة ،وزيادة على طبعي الهادي صرت أكثر هدوء ،وصرت انطوائي
لدرجة ان يومي اقضيه بالنوم والتفكير ،وإذا طلب مني عمل اقضيه بدون كلام ،صار الناس يشحذون مني الكلام كأنهم يشحذون مني فلوس ،وما زلت محتفظ بالورقة اللي
كتبتها شذى الله يرحمها أول مرة(أتحداك تعرفني؟؟؟))وكل ماناظرت الورقة تنزل الدمعة من عيني وأروح لقبر شذى وأصلي عليها .
والله مايسوى أعيش بدنيا دونك...لا ولا تسوى حياتي بهالوجود
دامك انت اللي رحلت وكيف ابصبر...عالبعاد وكيف انثر هالورود
ماوعدتك تقاسمني المحبة...وتبقى لي حبي ولعيوني دليل
بس حسافة الموت كان أقرب وأرحم...حسبي الله وحده ونعم الوكيل.
استمرت حالتي هذي تقريبا 4 شهور ،ويوم من الأيام اتصلت فيني شهد وأنا ماسك الورقة وأصيح ،بالأول مارديت لكن يوم شفتها ملزمة رديت:هلا!
قالت:السلام عليكم .
قلت:وعليكم السلام....
قالت:أدري انك تصيح ياخالد لكن في قلبي كلام ودي أقوله لك من زمان:شذى توفت الله يرحمها وأبيك تعتبرني مكانها وتعاملني كأني شذى،واللي أبيه انك ماتحبني عشاني
شهد،لا حبني عشانك تحب شذى وأنا مثل ماقلت لك حطيت نفسي مكان شذى،وننفجر صياح كلنا في وقت واحد وتقفل الخط ،بعدها بأسبوع جو من الرياض وكان على وقت
عيد الفطر،وهالمرة زوج خالتي هو اللي جابهم بنفسه ،وصباح العيد تجمعت العائلة كلها في بيت جدي ،وأنا كعادتي ماأحب الرسميات سلمت وعايدت وطلعت عند الباب ،
وبعد فترة وصلوا خالتي وما كان من خالتي الا انها نزلت من السيارة وجت لمي وضمتني ضمة حنان في الشارع(ليش ماأدري!!)وهي تصيح،قلت:خلاص ياخالة
واللي يسلم عمرك لاتبكين الحين يخرب مكياجك!!
قالت:ماأدري ليه ياخالد اذا شفتك تذكرت شذى الله يرحمها!
وغصب عني نزلت الدمعة من عيني ،قالت:آسفة ياخالد لأني حولت عيدك لحفلة بكاء.
قلت:لا لا مافيه اشكال اصلا العيد كله ماله طعم بدون شذى الله يرحمها ،وراحت خالتي وانا منزل راسي للأرض لكن جاء مكانها وحدة ثانية ،وترفع راسي وأتفاجأ انها
شهد قالت:خالد والله حرام اللي قاعد تسويه بنفسك ،وبكل جرأة وشجاعة تمد ايدها وتمسح دموعي ،قالت:خلوود لي خاطر عندك والا لا؟؟
قلت:وش دعوى ياشهد لك الخاطر كله.
قالت :طيب خلاص عشان خاطري ابتسم،وبصراحة كان مظهر عيونها ولثامها ياخذ العقل ،ولاإراديا طلعت مني ذيك الابتسامة اللي تقريبا من 4شهور ماإبتسمت مثلها،
وتصرخ ذيك الصرخة وتقول:أخيرا تنازلت تبتسم على العموم راح ادق عليك الليلة لأن هذي ماتسمى معايدة بس هاه رد علي مو زي المرة اللي فاتت.
قلت:ان شاء الله،طبعا الكلام هذا كله كان بحضور زوج خالتي اللي تفاجأت انه مادخل يسلم وظل متابع لكل حركات شهد،قال وهو مازح:إسمع ياخالد ترى ان تزوجت
غير شهد ماراح تشوف الخير أبد،قلت:لا توصي حريص ان شاء الله شهد لي مستقبلا ،ومن شدة حياء شهد راحت تركض مستحية من اللي سمعته.
استمرت اجازة العيد وكل يوم احلى من اللي قبله ،وجاء اليوم اللي كنت خايف منه،جاء يوم الوداع واللي كان مخوفني زيادة انه لا سمح الله يصير لهم مثل ماصارلهم
المرة اللي فاتت،ومن فقدوا؟؟فقدوا الانسانة اللي ملأت حياتي وخلتني انسان توه يذوق طعم الحب(الله يرحمك ياشذى).
أنا:الو السلام عليكم.
خالتي:وعليكم السلام هلا والله بهالصوت وراعيه.
وبعد تبادل التحايا قلت:ياخالة ممكن ادخل في الموضوع على طول؟
قالت:سم عسى مافيه شي؟؟؟
قلت:لي خاطر عندك ياخالة والا لا ؟؟
قالت:اذا كان خلوود ماله خاطر عندي اجل من اللي له؟؟
قلت:طيب ممكن اطلب منك طلب ؟
قالت:انت تآمر امر بس تدلل.
قلت:ودي ارجعكم للرياض بنفسي!!
هي استغربت من الطلب :انت؟؟ليش؟؟
قلت:ياخالة بدون لف ودوران أنا فقدت اعز شخص بالوجود ولا ودي افقد اللي مثله!!
قالت:الى هالدرجة ياخالد؟؟
قلت:واكثر ياخالة ،انتي ماحسيتي بالعذاب اللي تعذبته طول الشهور اللي فاتت وما خالطها من هم وغم وعزلة لذلك اذا لي خاطر عندك ياخالة وافقي على طلبي وخلي
زوجك يخلص شغله اللي في جدة ويختصر على نفسه المسافات.
قالت:أنا من ناحيتي موافقة لكن خلني اكلم زوجي وأرد لك.
وماتتصورون ياعالم الفرحة اللي جتني يوم اتصلت فيني خالتي تقولي ان زوجي موافق.
مسكنا خط الرياض السريع وأنا 120 ماأزود عليها وانا بالعادة 160ماأنزل عنها،وصلنا الرياض بسلامة ويوم نزلتهم وأبغى ارجع ل(...) والا هذي خالتي تقول:
على وين ياحلو؟؟
قلت:على ديرتي!
قالت:لا ياحلو الكلام هذا مايمشي عند ام شهد، وتمسكني مع يدي وتنزلني من السيارة،قلت:ياخالة عندي اشغال والدراسة بعد يومين ولا أقدر أقعد في الرياض (من باب
التصريف)وتقاطعني:خالد مثل مانفذت طلبك نفذ طلبي وبعدين انت تعبان من السفر ولازم ترتاح.
أنا بيني وبينكم كان ودي في القعدة ويوم شفت انها ملزمة علي قلت وش اللي يردني؟(الكلام هذا تقريبا الساعة5العصر)على طول دخلت البيت واخذت دش ولا بالخيال
وأنا طالع من دورة المياه(وانتم تكرمون)وكنت لابس الروب حق الحمام وأتفاجأ بشهد واقفة ومعها ملابسي:ملابسك غسلتها وجففتها وكويتها بنفسي وهذا اقل شي اقدر
اقدمه لك..قلت:عسى ربي يخليك لي ياشهد ونكبر ونتزوج ونعيش سوا وننام سوا و...ماكملت كلامي الا هي رامية الملابس بوجهي وهربت وهي تضحك.
انا تذكرت كلامي وجلست اسأل نفسي :كيف يطاوعني قلبي اقول مثل هالكلام؟؟تندمت على اللي صار وليتني ماقلت هالكلام بس وش تنفع ليت؟؟
أخذت نومة خفيفة لحد الساعة 8 بالليل تقريبا ويوم صحيت والاقي خالتي تنتظرني تحت:مساء الخير.
قالت:مساء النور والسرور هلا والله ببعد طوايفي هاه عساك ارتحت ؟؟
قلت:الحمد لله أخذت كفايتي من النوم وزيادة.
قالت:طيب وش رايك نطلع منتزه والا ملاهي والا لأي مكان؟؟
قلت:والله اللي تشوفينه ياخالة،وبلحظتها طلت علينا احلى بنت بالدنيا (طبعا امها رافضة انها تتغطى عني بما اني %خطيبها%)وجلست معنا:هاه اسمعكم تخططون على طلعة
قالت خالتي:ان شاء الله بنطلع لاي مكان تبونه .
قالت:طيب ممكن يزود معنا شخص واحد بس؟؟
قالت خالتي:مين؟؟؟
قالت:سارة بنت عمي لأني ناديتها وصعبة اعتذر منها وصعبة اخليكم تروحون وتخلوني!!
قالت خالتي:طيب استأذني من راعي السيارة!
قلت:وش دعوى ياخالة مابيننا استئذان.
قام كل واحد فينا يلبس ويتجهز واطق ذيك الغترة والعقال واطلع على اني ابسخن السيارة،وانا طالع من البيت على الحوش وتواجهني سارة وكانت كاشفة عن وجهها وبسرعة
غطته،أنا صديت عنها وطلعت للشارع ووجهي احمر من الفشيلة ،وانا قاعد في السيارة كنت افكر بوجه سارة الملائكي واهم مالفتني فيها عيونها اللي تاخذ العقل،لكن مهما كانت
ومهما سوت ماراح تاخذ حبي من شهد،ولما ركبوا السيارة حكم القدر ان سارة تقعد في المقعد اللي وراي(ماأدري هي صدفة والا مقصودة)،وطول ماحنا في الطريق كل
مارفعت راسي للمراية الاقي عيون ولثام تاخذ العقل وأنا لاإراديا انزل عيوني واناظر قدام ،وصلنا لملاهي &المرسى&ويوم جت الساعة11كنت قاعد على طاولة
وكرسي وخالتي واللي معها رايحين يتسوقون ،وأنا غارق في اعماق التفكير جتني بنت وقعدت في الكرسي اللي جنبي على طول،توقعتها شهد والا بنت عمها ولكن توقعي
ماكان في محله ،عرفت انها بنت غريبة من صوتها :السلام عليكم..
واناظر فيها بتمعن قلت:وعليكم السلام !غلطانة ياإختي؟؟
قالت:إيه غلطانة!!
قلت:علينا هالحركات ياآنسة ،لكن لاتتعبين عمرك اللي تبغينه ماهو عندي لذلك تكرما منك لمي اغراضك ودوري أحد غيري..
قالت:لحظة بالهداوة كل شي يصير،وش فيك حاط حيلك علي وانا جايتلك برجولي؟؟
قلت:لأنك ياآنسه وبكل صراحة بحركتك هذي وقحة وعديمة اصول ..
وكان كل اللي مخوفني ان شهد تشوفني مع البنت هذي وتفهمها شي ثاني ،قالت:تراك غلطت علي وجرحتني وانا الى الآن ساكتة عنك.
قلت:ياسلام يعني طلعت انا الغلطان !
قالت:لا خلاص انا سامحتك بس عطني وجه(أنا ماأدري من وين جايبه كل هالجرأة!!!).
قلت:لا تحاولين وبعدين يكون في علمك اني لاقي اللي تملئ حياتي لذلك قدامك خيارين:ياتمشين ياأمشي أنا بنفسي؟؟؟
وبحمد الله شالت اغراضها ومشت ، وبعدها بربع ساعة بس وصلوا خالتي واللي معاها ،مادخلنا البيت الا الساعة 4 الفجر تقريبا،وانا كل اللي شاغل بالي وتفكيري ذيك البنت
اللي قطت وجهها علي وكان فيني شعور غريب ان البنت هذي وراها شي ،يعني ماجتني عبث،بعد ماصليت الفجر حاولت انام لكن ماقدرت تفكيري مشغول بثلاث أشياء:
شهد وسارة والبنت المجهولة ،قررت اطلع شوي بالحوش،وانا طالع من باب البيت استوقفني صوت شهد وهي قاعدة تكلم في الحوش ،أنا ترددت اطلع والا لا؟لكن اللي
لفت انتباهي كلامها:طيب وش قلتي له؟عطاكي وجه والا لا؟وش رايك فيه؟؟لا يكون تفكرين تاخذين خلووودي مني!الحمدلله اني تأكدت انه يحبني.
أنا تسمرت في مكاني من قوة الصدمة بعد ماتأكدت انها تكلم البنت اللي قابلتني امس :معقولة كل اللي صار لعبة؟معقولة شهد ماتثق بحبي لها؟ألف سؤال وسؤال تردد في
بالي وانا أبغى أصيح من الصدمة!!، واجهت شهد وجها لوجه:شهد ممكن اعرف من اللي صلح اللعبة معاكي؟؟
هي اتفاجأت وظهر على وجهها علامات الخوف وقطعت المكالمة:أي لعبة؟؟؟
قلت:شهد ادري ان التنصت للآخرين عيب لكن احب اقولك اني سمعت كل كلامك لذلك بدون اي لف ودوران ممكن اعرفها؟؟
قالت:بدور زميلتي.
قلت:اللي فهمته من كل اللعبة هذي انك ماتثقين فيني ولا تثقين بحبي لكن ماأقول الا شي وااحد(((الله يسااااااااامحك))))!!..
وتذرف عيوني دموعها ،والاقي نفسي لا شعوريا الملم أغراضي واعود من حيث اتيت ،كانت الساعة8 صباحا وانا ماسك خط القصيم ودموعي مالية سيارتي من كتر البكاء
اتصلت خالتي فيني ولا كان في نيتي اني ارد ،وصلت مكالماتها اللي مارديت عليها11 مكالمة،وتجيني ذيك الرسالة اللي أقنعتني وخلتني أرد:
((خالد شهد هي اللي اخطأت عليك ولا تعاقبني معاها ،لو سمحت رد علي))بعدها اتصلت فيني ورديت:نعم!
قالت:خالد كيف يطاوعك قلبك تترك البيت وتسافر وما تعلمني لا وزيادة على كذا انك مواصل يعني لو صار لك شي لا سمح الله حنا السبب.
قلت وصوتي متقطع من البكاء:مستوية عندي ياخالة صار لي شي والا ماصار ،أنا فقدت شذى الله يرحمها لآخر حياتي بس قلت ان شاء الله ربي بيعوضني بشهد وبعد
ماعطيتها كل حبي وثقتي تجي وبهالحركة التافهة هذي تهدم كل اللي بنيناه ،سامحيني ياخالة انا مظطر اقطع كل علاقتي معكم بعد كل اللي صار.
وغصب عني قفلت الخط لأني عجزت اتكلم من البكااء،يمكن تقولون ياحبايبي ان السبب تافه لكن اذا جربتوا الحب الصادق وصار فيها زلة ولو صغيرة من احد الطرفين
الله يستر من اللي تجيبه الزلة هذي لأن (غلطة الشاطر بعشرة).
استمرت حالتي هذي أيام وايام ،انطوائية وتفكير وقلة اكل ونوم حتى ان جسمي نحف زيادة عن اللزوم ،أروح للجامعة وأجي ولا كأني حضرت شي،فقدوني زملائي وبالأخص
حمودي،جوالي أصير مقفله وحاط موجود ويوميا من 20 الى 30 رسالة كلها مكالمات نصها من شهد ونصها من أمها،وخلال الفترة هذي اكتشفت ان حبي بهالدنيا راح
مع شذى الله يرحمها ولا بقى لي حب.
ويوم من الأيام كنت قاعد بغرفتي على النت ودق جوالي :السلام عليكم .
قلت :وعليكم السلام،وكانت عند خالتي في الرياض وشهد بجنبها يعني من يكون المتصل:شهد!!أنا استنكرت هالصوت لأن حاط في بالي انها العنود..
قالت:أخيرا قدرت اوصل لك ياخالد ،واللي يسلمك طلبي الأول والأخير لاتقفل الخط مو عشاني (حبيبتك وخاينتك)بس عشاني بنت خالتك!!!.
قلت:ممكن تقولين اللي عندك ؟؟؟
قالت:خالد كل بني آدم يخطي وماهو عيب انك تخطي لكن العيب انك تكرر الخطأ،يعني كل اللي ابغى أقوله اني أخطيت واللي أرجوه انك تسامحني ،وانت حر بعدها
ترجعلي والا ماترجع هذا شي راجع لك بس كل اللي ابيه انك ماتشيل بقلبك علي وهذا كل اللي اقدر اقوله ومع السلامة ...
تأكد لي بعد هالمكالمة ان مشاعري وعاطفتي تجاه الحب ماتت ولا راح ترجع ، وانا كل اللي عشته انا والحب مايتجاوز سنة وحدة بس،لكن صدق من قال ان الحب
يسوي اكثر ومو أي حب ،الحب الصادق بس ،بكذا حبايبي اكون خلصت القصة واياكم ، أنا أدري ان نهايتها تافهة لكن كل اللي عندي وقلته وماودي أقول شي غير واقعي
عشان مايمتزج الواقع بالخيال،وكل اللي أبغاه انكم تدعون لصاحب القصة ولكاتبها ،والسلام خير ختام....
وهذا علشانك امواج الذكرى
منقووووووووووووووووووووووووووول
تحياتي
الثلاثاء أغسطس 26, 2008 3:56 pm
