هل لك اكله مفضله ؟ ادخل وكل قصدى وقول

أنا بحب البسلة والفراخ والسمك وكبدة الفراخ والمكرونة الحمرا اللى هى بصلثة الطماطم

بس انا مش بعرف اعمل اى حاجة فيهم اعرف اكلهم وبس

انا بحب اكل ايه
بحب المكرونه بالباشميل
وبحب محشي الكوسه
الفراخ البانيه
والشاميه
وسمك البوري المشوي

وطبعا وهقول طريقة عمل الشاميه وهي اكله من اسمها شاميه

هي عبارة ااصلا
عن طعمية ممكن تكون طعمية حمص او طعمية فول
لو شامي هتبقي طعمية حمص

بعد ما تتقلي في الزيت وتبرد بتحط عليها لبنَه
وممكن الاستعاضه عنها بالزبادي

انا بفضل تكون اضافة الزبادي او اللبنه قبل ما الطعمية تبرد
يعني علشان تشربها وتبقي طريه

طبعا ممكن تتعمل سندوتش
وممكن تتاكل كنوع من انواع المقبلات

وبالف هنا وشفاء

انا بحب المكرونة بالبشاميل والمحشي طبعا بانواعه واكيد السمك والخروف بتاع الاستاذ اشرف وهو المندي والبامية
بالنسبة للاكله الي حقول وصفها وهي السمك

لانه الاسهل حنجيب السمك ونتبلة ونقليه في الزيت بس
اي خدمة
تسلم ايدك اخي الغالي علي الافكار الجميلة

ايوة حلو الموضوع ده جميل

انا بحب المكرونة بالبشامل والمحشى بانواعة

والسمك بانواعه
والطيور بانواعها وخصوصا الرومى

والبسلة

وصنية البطاطس فى الفرن باللحمة او الفراخ

وبحب البيض المسلوق جدا وهقولكم على الطريقة

اولا تشترى البيض من البقال
وبعدين تحطو فى وعاء مناسب ثم تضعو على النار لمدة ربع ساعة
ثم تطفىء الناء وتقشرو وتكلو بالف هنا وشفا

محمود والفراشه ضحكوا علينا يا ببلاوي
انا بحب محشي الكرنب
الكشري
البفتيك والبانيه
والكباب والكفته
وصينية البطاطس في الفرن
وكمان البسله بالجزر والفاصوليا بيضا وخضرا
اقولكوا بأه على طريقة عمل السمك السنجاري
نجيب السمك الدنيس أو المياس ونفتحه ونخليه مفرود
نعمل الخلطه المعروفه توم وفلفل وخضره وخل وليمون وملح ونتبل بيهم السمك
نسيبه في التتبيله ساعه
نجيب فويل ونحطه في أرضية صاجة الفرن
ونحط السمك فوقه
ندخله الفرن وقبل مايستوي نطلعه نرش عليه عصير ليمون
وندخله تاني ونسيبه لحد ما باخد لون البني لون الشوي
نطلعه ويتقدم مع الرز وسلاطة الطحينه والزبادي
وبالهنا